ŠIAULIŪ MIESTA FUOLKLUORA ANSAMBLIS "AUDA"

1987 metās Šiauliūs, Boitėnė gļventuoju aptarnavėma kombinatė pradiejė kortėis folkluorinis ansamblis. I anou tumet būries vėsuokiu pruofesiju žmuonės: inžinierē, mezgiejės, siuviejės. „Pėrmās mienesēs dar nė nežėnuojuom, kor krīpsem - vėsėms patėka šuoktė dainiuorė. Miegėnuom dainioutė senuovėnės aukštaitiu, dzūku, žemaitiu dainas. Bet ne tēp lėngvē bova gražė tarmė anas ėšdainioutė... Po kuriuo laika apsėžvalgė pamatiem, ka beveik vėsė esam žamaitē. Pamatiem, ka ė daina gimtoujė kalbo īr daug maluoniau trauktė. Tēp atraduom patis savė”,- pasakuo ansamblė dalyvė Žalnieravičienė Birutė.

Pavadėnėma ansambliou teka ėiškuotėis ėlgā, bet neveltou. Daukonta Sėmuona raštūs vaduovs Žalnieravīčė Mīkuols radės tuoki žuodi „auda”, katruo reikšmie

īr dėdlē prasminga - rauda, gėismie, daina. Kāp pėršto i aki pataikīta! Vėsėms tas vards dėdlē patėka ėr ansambliou greitā prigėjė.

Koncertava „Auda” tonkē - ne tik Lietuvuo, bet ėr užsienie. Ne tik patis važiniejė, bet ėr sava nomūs svetiū liob solauktė.

Sobiriejos Boitėnem gīventuoju aptarnavėma kombėnatou, ansambli i sava būri prijiemė Žemaitiu kultūras draugėjė „Saulaukis”. „Audas” dainininkā ėr mozėkontā vėsās laikās liob daug pamačītė draugėjės rėnginiūs.

Naus etaps „Audas” gīvenėmė prasėdiejė, kā ansamblis pasėdarė Šiauliū miesta fuolkluora ansamblio. Tumet šėik tėik pasėkeitė ėr patėis ansamblė nariū sodietės: atejė naujū mozėkontu, sosėkūrė stėpri, autentėška kapela. Tėkros atradėms bova Navickis Untuons, katros ne tėk dėdlē poikēgrėiž smuikelio, bet ėr pats sava auksėniems ronkuoms dara basedlės, kėtuokios instrumėntus. I ansambli atejė poikė dainininkā V.Sukarevičienė, D.Dargienė, R.Šarkauskienė, O.Vasiliauskienė, A.Tuoleikis. Dėdliausė paspirtis ansambliou, kāp pasakuojė Žalnieravičienė Birutė, īr pruofesuorios Balčītis Eduards ėr anuos banduonėjės.

„Audas” ansamblis ne tik koncertoun, dalīvaun vėsuokiūs sosėtėkėmūs, bet tēp pat daug prisided pri žemaitėšku tradicėju, papruotiū išlaikīma. „Auda” jau daug metu īr pagrindinis Užgavieniu švėntės ikviepies, organizatuorios ėr dalīvis Šiauliū miestė. „Tou dėina ansamblietē vėsus Šiaulius sukel ont kuoju: mozėkontā ėr dainininkā, parsirėngė kupruotās žīdās, obagās, triukšmingās cėguonās, jaunāsēs, so vėso veselninku svėto, meško, vėngūrās, lašėnėnio ėr kanapėnio, velniū būrio, so gėltėnė prīšakie išēn i miesta gatvės”,- prėsėmėn Žalnieravičienė Birutė. Užgavieniu vakara „Juonė pastuogie” vīkst nuotaikings, savaimings ėr tetralizouts vėsuokiausiu ližīnu prisistatīms ėr pasėruodīms. 1996 matās bova išlēsta kningelė „Užgavėnės Šiaulių krašte”. Anou spdarė Mikalauskienė Alė ėr Žalnieravičė Mīkuols.

Tās patēs metās žemaitėška šuoki ėr daina ansamblis bova nosėvežės i Švedėjė, Kristianstadta miesta, kor vīka didilis fuolkluora festivalis.

1997 metās „Auda” ėšlēda audiokasetė, i katrou sodiejė vėskū, kū geriausė turiejė per pastarūsius metus.

© Žemaičių kultūros draugijos redakcija, 1998-2000. Tinklalapis atnaujintas 2003.05.15 . Pastabas siųskite adresu: